Bugun Respublika “Hunarmand” uyushmasi raisi R.Mirzaaxmedov zoom platformasi orqali Farg‘ona viloyatida faoliyat ko‘rsatib kelayotgan hunarmandlar ishtirokida joriy yilning 18-martdan 18-aprel kuniga qadar Navro‘z bayramiga bag‘ishlab o‘tkazilishi rejalashtirilgan «Farg‘ona ohanglari va ranglari» an’anaviy badiiy hunarmandchilik ko‘rgazmasi oldidan yig‘ilish o‘tkazdi.
Yig‘ilishda ko‘rgazmani yuqori saviyada tashkil etish, unga puxta tayyorgarlik ko‘rish kabi masalalar ko‘rib chiqildi.
Ushbu ko‘rgazma Farg‘onaga bag‘ishlangan bo‘lib, unda kulolchilik, to‘quvchilik, yog‘och o‘ymakorligi, zargarlik, badiiy kandakorlik, kashtachilik, gilamdo‘zlik kabi sohalarda aynan Farg‘ona maktabining haqiqiy an’analarini saqlab kelayotgan va davom ettirayotgan hunarmandlarimizning ijodiy ishlari namoyish etiladi.
Ko‘rgazmada kulollar Sharofiddin Yusupov, Alisher Nazirov, kandakorlar va metallga badiiy ishlov beruvchi ustalar Hasan Umarov, Zokir Gʻafurov, yog‘och o‘ymakorlari Mirzayunus Umarov, Mahamatali Yunusov, Jamshid Madg‘oipov, badiiy to‘quvchi ustalar Rasuljon Mirzaahmedov, Ibrohim Sultonov, kashtachi Nargiza Sherxo‘jayeva va gilamdo‘z usta Ilhom Davletovlarning noyob asarlari ham namoyish etiladi.
Ko‘rgazma xorijiy mamlakatlarda ham namoyish etilishi rejalashtirilgan.
Ko‘rgazmada nafaqat hunarmandlarning san’at asarlari, balki farg‘onalik hunarmandlarimiz haqidagi filmlar namoyish etiladi, yoshlar va barcha qiziquvchilar uchun mahorat darslari, ko‘rgazma doirasida ma’ruzalar, ijodiy muhokamalar va ishtirokchilar bilan ijodiy uchrashuvlar o‘tkaziladi.
